7 20th St S, MI 49015
(www.myfbcbc.org)
discipline

ZIANGRUANGAH NUN IN SIM? (SELF-DISCIPLINE)

Albert Hum


Hmin thang zetzet pawl ziangruangah hitluk in nan hlawhtling timi in sim thei pei maw, tiah thusuhnak an nei tikah thilmak zetzet an sim ciamco dah lo. CBANA sungih kan rinsan zetmi kan Mino director Rev. Dr. San No Thuan nih “PHD harzet in ka kai rero ih himi ka zirmi lak sungin, in zirh ngahbikmi tiah ka ruahmi cu Sikan ( Self Discipline) nei ding timi a si” tiah in sim dah.

Hremnak kan tuar tikah kan tuar laiah cun kan lung in awitertu si loin kan riah in siattertu a si. Sikhalsehla a hnuah cun cubangtuk hremnak in nunsimnak a tongtu pawl cu an nunnak ah daihnak le dingnak laksawng an ngah ding.”

      — Hebrew 12: 11

Thangsomi le mipitling si dingin, thil maksak zetzet kan tuah tul vekin kan ruat theu, asinan kan tuah tul sawn ngaingai mi cu nitin kan nunnak ah a fate zet ah kan ruat theimi thil tha fate te tuahnak sawn in a si theu. Kei tla sikan nei dingin zirhtu tampi ka rak nei. Asinan, ka rak duh theu lo. Ka rak ngai  duh theu lo. Tlawng ka kai vivo ih, hnatuan phunphun ka tuan vivo, miphun dang, mi thangso zetzet pawl thawn kan pawlkom aw vivo tikah ka rak ngai duh lomi nun simnak pawl ka hlamsal zet theu ih har zetin keimah tein ka zirsal ciamco theu. Nunsimnak le Sikan nei dingin kan zirhawkmi pawl hi kan huatawk, kan hremawk duh ruangah si sawn loin, kan duhdawt awk ruangah hivekin nun kan simawk a si, timi tla kan fiangsal vivo.

Sikan nei ( Self-Discipline) timi cu kanmah kan nunnak kan thanglian, kan pitling theinak dingah mah le mah ukawk theinak, ti’n ti sehla a sual lo ding. Nu le Pa, sung le khat, zirhtu pawl ih in zirhnak ruangah Sikan neimi minung ah tla kan cang thei ih, kanmah tein thanso duhnak thinlung thawn mah le mah ukawk theinak zir vivo tla a theihmi a si. A fiangmi cu ziangtikhmanah sikan nei dingin kan nun thlengawk ding caan a tlai tuk, caan a liam zo ti a um lo ih, kan zir theh zo, sikan kan nei zo tiah zir tawp ding tla a um lo timi a si.

Pathian nih tla a faale pawl hi mi pitling, mi hlawhtling, mi santlai, lungawinak le thin hnangamnak thawn a khatmi nunnak nei thei dingin in duhsak. Culeh, himivek nunnak nei thei dingin Amah sungah kan um ih, Amah thawn pehtlaihnak kan neih lawngah afamkim nunnak kan nei thei ding timi tla a tel. Curuangah, kan Bible sungah kan zoh asile Pathian nih Amah thawn naih dingin le Amah duhdawtnak sungah um dingin nunsimnak, sikan nei dingin in zirhmi tampi kan hmu thei. Pathian nih thil maksak zetzet, mangbangza thil tuah dingah a lo ko lo tla si men thei, asinan in duhdawt tuk ruangah Amah ih in duhsakmi nunnak nei thei dingin nitin tein in zirh duh ih, kan nunnak in rem duh ringring. Amah sungah um dingah in ko ringring a si.


 

Share on Google+0Share on Facebook120

0 Comments

Add a Comment

Your email address will not be published. Required fields are marked *