7 20th St S, MI 49015
(www.myfbcbc.org)
IMG_8774-1024x683

KUUT THLA THURUAT

Rev. Biak Lian Thang
Shema_October


Lai kumthar puai pakhat ah Lai thuam hruk loin kan tel pang ruangah soiselnak kan rak tong dah. Pastor pipi ih Lai nunphung a fingkhawi lo, ti in. Lai Nunphung fiangkhawinak hin himi hnakin a thuk deuhmi sullam a nei ka zum. Cun, Lai nunphung kilvennak ah tiin Laipuai (Lai Kumthar) hi kumtin paisa tampi cemin kan tuah. Tui’ tum kan khua khal ah pengthen dangdang ihsin mino tamzet an ra suak. Hi puai ah nomnak (entrainment) hrangah kan caan 70% hrawng kan hmang. Himi hin kan Lai nunphung ziangtluk in a tuahtha pei? Rev. Dr. Hre Mang cun, “Kan Laipuai hi nomcemnak lawnglawng ah kan hmang asile kan miphun camsiatnak puai ah a cang leh thei,” tiah ralrinnak in pek.

Nunphung “culture” timi cu French tong “colere” timi ihsin a ra. A sullam cu kilveng (tend), fingkhawi(nurture), thanter (grow) tinak a si. Cutiih sullam a neimi Nunphung (culture) sungah cun Sakhua daan (religion), thuruah daan (ways of thinking), nitin nuntu khuasak daan (social habits/ways of life), tong le calai (language) le awnmawi (Music & art) tivek pawl an tel.  Curuangah Nunphung timi cu kilven tulmi le thansoter tulmi tin phunhnih in a um. Miphun pakhat in an nunphung cu kilkhawi tulmi kilkhawi in thansoter tulmi an thangsoter tik lawngah mi phunpi (civilized people) ah an cang thei ding.

Laimi pawl khalin duhnungza kilkhawi tlakzetmi nunphung tampi kan nei. Rinumnak hi Laimi pawl kan hmel langtertu kan thlalang a si. Nupi pasal thitawk tikah khungkhai zetin thiaw a si ih dam sung thenaw ti a um nawn lo. Fala tlangvalnak ah felfai zetin rikhiah cinri a neimi nungphung neitu kan si. Miharsa bom, midamlo pawl hrangah an lo hnatuan bawm, inn le lo neilo mifarah pawl hrangah inn sak bawm tivek Samaria mithapa ih lungput hi Laimi pawl ih lungput le kan nunphung a si. Ralthat lamah “C- Con Bik Paraltha” kan ti theu vekin ram le miphun humhimnak lamah miraltha, mihuaisen phun kan si. Milaw phun le kawhhal te ei in vanzam tiang mawng ko a zuam duhtu zuam tento miphun kan si. Hi pawl hi kan nunphung diktak cu an si. Pathian ih thu thawn kalhawnak a um lo. Hi pawl hi kilveng (tend), fingkhawi (nurture), le karzaiter le thansoter ding kan si. Lai thuam hruk le Lai hla saam lawng hi Lai nunphung fingkhawi a rak si thluh lo.

Lai nunphung sungih fingkhawi nawnlo in tanta dingmi pawl tla kan nei. “Zu” in hi Lai nungphung a si. Bawi le Lal lungput tla hi Lai nunphung a si. Hrinhnam lungput khal hi kan nunphung pakhat a si. Rirai biak hi kan nunphung a si. Hi bang pawl hi Pathian thu thawn an kalhaw ruangah kan nungphung sungah nunter nawnlo in tanta dingmi pawl an si.

Cun, kan pupa nunphung cu a si lo nan, kan thlennak kiangkap ihsin kan zir ih kan nunphung sungah hmun a luah vivo mi sancop nunphung tla kan nei. Fala tlangval living together ih um tivek hi kan nunphung a si dah lo. Kum 18 kim hnu nulepa thusim ngai duh loin, mai’ duhduh ih um tivek kan nunphung a si dah lo. Mibum ih paisa hawl tivek khal kan nunphung a si lo. Relsiat awknak, iksiknak, thenthek awknak, dokalh awknak, mai’ zawn lawng ruatawknak tivek pawl hi kan nungphung sungah cakzet in a lut vivo zo. Santhar Lai nunphung an si rero zo. Hi pawl hi Pathian thu thawn a kalhawmi nungphung pawl an si. Curuangah kan nunphung diktak sungih an lut vivo lo nak dingah kawhhran le zatlang pawlkom tang tlangin kilkip ihsin kan kham a tul.

Curuangah tansan tulmi le hnong tulmi nunphung pawl tansan in, a thami (life affirming) nunphung pawl lawng somso in nitin kan nunnak ah Laithuam mawite bangin hruk in Pathian sunlawinak langter ding kan si.


 

Share on Google+0Share on Facebook120

0 Comments

Add a Comment

Your email address will not be published. Required fields are marked *