7 20th St S, MI 49015
(www.myfbcbc.org)
BattleCreek.LakeviewBapt.1973Reuter.Boorsma03

BIAKINN THUANTHU TAWI

August Finalized
Ed Ritzler (Lakeview Baptist Church)

1839 kum ah South Side Baptist Church (atu’h “Frist Baptist Church of Battle Creek”) cu Milton, Michigan ah din a rak si (Milton timi khua fate cu 1843 kum ah “Battle Creek” tiah a hmin an rak thleng). 1920 kum a thlen tikah South Side Baptist Church (First Baptist Church) cu sungtel 750 tiang a rak karh. Curuangah biakinn pakhat sungah an tlem nawn lo ih Summit Park Baptist Church timi a rung hring suak. Hi biakinn cu Bidwell Street, Battle Creek ah an rak sak. Cuihsin Summit Park Baptist Church in mission church pakhat a run hring lala ih “Prairieview Baptist Mission Church” tiah a hmin an sak. Prairieview Baptist Mission Church cu 27th Street kiangkap ih a ummi pawl hrangih dinsakmi biakinn a si. 1939 kum ah Rev. George Seifert cu Summit Park Baptist Church le Paririeview Baptist Mission Church te kawhhran pahnih ah Church Pastor a rak tuan.

Rev. George hi biakinn pahnih ih a rak ummi sungtel pawl hmunkhat ih finkhawmtu a rak si. Cuticun, George ih hohatnak in 1940 kum, November thla ah hmunhnih ah a ummi sungtel pawl finkhawmaw in, “Lakeview Baptist Church” timi kawhhran an rak din tlang. 1941 kum, March thla a thlen tikah atu’h biakinn hmun, 20th street le Territorial Road pehawknak sirih leiram hmun cu biakinn thar saknak dingah an rak lei suak. Cuticun, First Baptist Church le Michigan Baptist Convention pawl ih sumpai lam tanpinak thawngin December 28, 1941 ni ah innhram killung phun in biakinn thar sak hram an thok ih September 20, 1942 ah an theh suak. (Himi biakinn cu atu’h nauhak Sunday School an zirnak hmun khi a si).

Sungtel mipum kan karh deuhdeuh ruangah 1950 kum ah Rev. George in a tum deuhmi biakinn pakhat sak sal dingin a mipi pawl in forh/sawm. Cuticun, 1955 kum ah atu’h biakinn tang (basement/social hall) kha sak hram kan rak thok sal ih March 1956 ah kan rak thehsuak. Biakinn tang (social hall) saknak ih a cemmi sumpai cu kum 3 sung kan rulh hnuah 1959 kum ah a tlunih khawmnak hmun (a tu ih Sanctuary) sak hram kan thok sal. June 19, 1960 kum ah a tuih khawmnak hmun (Sanctuary) cu Pathian hnenah hlan in kan rak hmang thok. Cun, biakinn a hlun (Nauhak Biakinn) tla tha te’n kan remsal ih September 1960 ah a thar in Pathian hnenah apnak kan rak nei sal.

August 1971 kum ah Rev. Seifert (George) cu kum 31 sung Church Pastor a tuan hnuah a hnatuannak in in colhsan. Hi laiah sungtel mipum 500 kiangkap kan rak si ih Nipisun ih a khawm theitu hi 300-350 lak kan rak si ringring. Rev. George in in colhsan hnuah senior pastor pa (5) kan rak nei. Atu fangih kan church pastor cu Rev. Adam Metzger a si. Lakeview Baptist Church cu American Baptist Churches of Michigan thawn pehtlaihnak kan nei. Sungtel hrekkhat pawl cu ABC, MI sungah hruaitu dinhmun in Pathian riantu tla an rak si. A hrek cu ABC Board member ah tuanvo neitu pawl an si ih President dinhmun tiang tla kan rak tuan ban ve. Kan kawhhran in Convention khawmpi le Mino khawmpi tla kan rak dar dah a si.

1971 kum ihsin biakinn cu san man vivo dingin rem le bet vivo a si ih elevator, zung/office, carpet thar, le pipe organ pawl bun/tuah/sak/bet a rak si. Culawng siloin, stage hrangah sanman meitleu (spotlights), audio/visual technology, heating system le energy efficient windows pawl bun thluh a rak si.

2010 kum thokin sungtel mipum kan tumsuk vivo ruangah hi biakinn hi ziangtin hmaiah ke a kar thei ding timi kan ruat thok. Kan biakinnpi hi kan tulmi hnakin a tum tuk ti tla kan hmusuak. Cun, biakinn hrang thla tin pek tulmi sumpai (operation cost) hin church budget pi cu na nawn in a run hngong phahphah fawn. Himi lai caan ah Pathian in Falam Baptist Church cu kan hnenah a run thlah. Khrih ah duhdawtmi Falam Baptist Church pawl in hi innpi cu sunzom in Pathian ram karhzainak dingah naza zetin an run hmang sal. Hiti ih zalen zet ih an hman theinak dingah August 01, 2017 ni ah a tulmi catlap pawl tuah in leiawk fel a si zo. Tuihni thokin hi biakinnpi cu Pathian in Falam Baptist Church kut sungah amai’ hnatuannak ah a pek zo a si.

Thilmaksak a tuah ruangah Pathian cu thangthat si ko seh!”

Thuanthu cangrel thar a thoksal zo!!!


 

Share on Google+0Share on Facebook120

0 Comments

Add a Comment

Your email address will not be published. Required fields are marked *