7 20th St S, MI 49015
(www.myfbcbc.org)
Jacob Valerio

ZIANGTIKAH RALPI A THO DING?

Rev. Biak Lian Thang

Shema_May


2017 kum kan zoh asile zum lo, rin lo zetzet in thilcangmi kan hmu thei. Tahthimnak ah Donald Trump in President sinak a co, Afghanistan ah US in MOAB bomb (Mother Of All Bombs) tiih kawhmi Nuclear Bomb siar lo ah a tumbikmi Bomb a thlak, Syria Air-Base ah US in Tomahawk Missile 59 a kap suak, Raldonak Vanzam phur Tilawng tum zet USS Carl Vinson, Destroyer Tilawng pawl le Nuclear ralthuam phur Tisunglut Tilawng (Sub Marine) pawl cu Korea tikulh an thleng thepthep, Mi piangthar zet Vice-President Mike Pence in N. Korea tlunah “thinsaunak in a daih nawn lo,” tiah a ti. Ziangtikah hi rapthlakza ral a tho ding? Pathian in Ezekiel 38 sungah raal a thawh ding tikih thil cang dingmi thil phun (3) in sim.

Israel pawl an ram ah an kirsal ding

Ezekiel 38:7-8 sungah Magog (Russia) le a tanpi pawl in Israel cu a ram ih an kirsal hnuah thlipi bangin an do ding tiah a sim. Israel pawl cu kum saupi leitlun khuaza ram kipah an thek darhaw nan 1900 kum hrawng ihsi thokin an ram ah tlunsal hram an thok. 1948 kum a thlen tikah “State of Israel” tin ram an rak din sal. Cuticun, Amos ih simmi prophet thu cu a kim ta, “Ka minung pawl an ram ah ka kirter sal ding. A siat ciami an khua pawl an sak sal dingih cutawkah khua an sa sal ding,” (Amos 9:14). Ralpi a thleng ding caan ih thil cang ding thupi zet pakhat cu a thleng zo, a kim zo.

Israel pawl cu an ram ah milian zet an si ding

Israel cu an ram ih an kirsal hnuah Pathian in milian zet ah a tuah hai ding timi hi Profet Ezekiel in a rak sim cia, ““milai siseh, tilva siseh ka karhzaiter ding. A hlan hnakin minung nan tam deuh ding ih faate tla tampi nan nei ding. A hlan ih nan rak um theu vekin cutawkah nan um ding ih tuihhlan hnakin mi thangso ah ka lo tuah ding. Cuticun Bawipa ka si hi nan thei ding” (Ezk 36:11). Asile Israel hi tuihhlan hnakin an `hangso ih an lian maw?

  • Isreal ram ah company 616 a um. Mipum 12,500 ah company pakhat an hlawmaw tluk a si
  • America ram ah cun mipum 47,000 ah company pakhat kan hlawm aw
  • Leitlun Economic Rank ah 3rd nak an si (Finland, Switzerland, Israel, Japan, America)
  • Billionaire 17 an um; Millionaire 88,000 an um
  • Leitlun ih a lianbik 15 sungah mi 10 cu Jews an si.

Hi pawl zoh tikah Israel cu a hlan hnakin an lian deuh ngaingai. An thangso deuh ngaingai. Ralpi a thawh ding caan ih thil cang dingmi thil phun thum sungah phun hnih a cang zo; 1) Israel cu an ram ah an kirsal zo, 2) an ram ah milian zetzet ah an cang zo. Ziang a tang lai?

Israel ram cu Daihnak in a Khat Ding  

Israel ram hi atu dinhmun kan zoh asile a dai hrimhrim lo. Hmuntin ah Bomb a puak, meithal kahawknak in a khat, thahawknak, thuelawknak, ram cuhawknak, thi le hnai suahawknak in a khatmi ram a si. Asinan, Ezekiel cun, “Ralhruang le ruhkulh zianghman nei loin khaw sungah daite le hnangamte’h a ummi…pawl kha do na tum ding,” (Ezk 38:11), tiah a ti. Himi caan; Israel ram dai zet ih a um caan, hnangam zet ih a um ding caan hi Thianglawr (Rapture) a thlen hnu caan reilote ih thil cang ding mi kha a si. Rapture a theh hnuah Anti-Christ (666) cun Israel thawn kum (7) hrang remnak a tuah ding. Curuangah Israel ram cu a kilhimsak ding ih raal hmuahhmuah a dai ding. Cun, hnangam zetin an um ding. An ralthuam hmuahhmuah an phoih thluh ding ih nuam zetin an um ding. Asinan, kum thum le a hrek a kim tikah Anti-Christ cun daihnak lungkimnak (peace agreement) an tuahmi cu a balsiat ding ih cuticun a netnak ralpi (Armageddon) ral a suak ding (Daniel 9:27; Thu 13; Ezk 38, 39).

Thunetnak

Tuini ah Israel ram hi dai zet le hnangam zet ih a um lo hi Pathian thangthat ding a si sawn. Ziangahtile Rapture a thleng hrih lo, zaangfahnak sangka a ong lai, a net a thleng hrih lo tinak a si. Jesuh khalin,

Lam naite ah siseh, lam hlapi ah siseh raldonak thawmvang nan thei ding, asinain va phang hlah uh. Cubangtuk thil cu a um ding, asinain a netnak a thleng tinak a si hrih lo.” (Matt 24:6)

tiah a ti ve.

Unau, ni netnak caan ih a cang ding mi thil phu thum sungah phun hnih cu an cang zo, a kim zo. A pathumnak a kim hlanah Rapture a thleng ding. Rapture thu thawn pehpar in Jesuh in, “Nunau nu ih Nauhrinnak” naa bangin a tah`him (Matt 24:8). Nauhrinnat caan le nausuak caan hi a rei lo, hmakhatte, caan tawite sung a si.

Kan leilungpi hi nauhrinnat in a naa rero zo. Israel le kiangkap ram pawl ih buainak a sosang deuhdeuh; America, N. Korea, China, le Russia ram pawl khal in hriamhrei cahnak an zuamaw rero zo, Syria ram sung buainak a sosang deuhdeuh, ISIS pawl an ci a mit thei cuang lo. Nau hrin ding a naih tuk zo. Unau… Jesuh na nei zo maw? Na ralring zo maw? Israel ram daite le hnangamte ih um ding caan na hngak pang asile na tlai tuk pang ding!!


 

Share on Google+0Share on Facebook112

0 Comments

Add a Comment

Your email address will not be published. Required fields are marked *