7 20th St S, MI 49015
(www.myfbcbc.org)
web image_global warming

ZUMTU LE KAN KIANGKAP

Christina V. Sawnset (Hnem Hnem)


Global warming and Climate Change: Leilungpi a Saa Vivo, Nikhua a Thlengaw Vivo

Nikhua thlengaw timi le leilungpi a saa vivo mi hi an bangaw lo nan an pehtlaih aw. Nikhua a thlengaw timi cu (natural process) amah ten a cang mi a si thei ko nan leilungpi a sat vivonak hi cu nangmah le keimah ih tuahnak ruangah a si. 21st century sungah leilungpi a kel hnakin 2 degree Celcius in a satnak a thang ding ih zianghman kanmah lam in tuahthat mi um lo a si ahcun 6 degree Celsius tiang a kai ding tiah khuakhannak a um. Ziangruangah leilungpi a saa vivo timi khal ka run ngan ding. Tuini ah leitlun ih minung 780 million cu leilung a ro tuk ruangah in ding tidai thiang nei lo in an um. Cu lawng hman siloin minung 1.1 billion pawl tla cu tidai le a dang harsatnak ruangah ekinn an nei lo. Himi pawl ruangih suakmi natnak ruangah nitin leitlun ah nauhak pakhat seconds 20 tinten an thi ringring. A hleice in cholera tiih kawhmi tidai thiangfai lo ruangih suakmi Vibrio cholera bacteria ruangah sungdok, luakluak natnak ih thi mi an tam. Leilungpi a saa vivo timi hi el theih lo rori in kan hmu rero nan minung tampi cu an zum duh lo, mi hrekkhat cu an zum ko nan ziang siar loin an um. Zumtu nang le kei teh ziang siar lo ih um ding kan si maw?

Pumpak in kau le tum zet in kan kiangkap  hrang hna kan tuan thei lo hmanah, nitin kan tuan thei dan tampi a um.

Ziangruangah leilungpi a saa vivo tile mirang tong in Greenhouse gases tin kawh an si mi carbon dioxide (CO2), méthane (CH4), Nitrous oxide (N20) le chlorofluorocarbon gas pawl hi suak loin thli sungah an tang.  Himi gas pawl hi hlanlai ahcun thingkung pawl in an hawp ih a heraw thei nan, leitlun ah minung kan tam vivo hleiah thingkung pawl kan duhduh in kan hau ih lungmeihol tivek duhduh in kan khang tikah amah ten a her aw thei nawn lo. Nitrous oxide (N2O) tiih kawhmi gas tla cu a um cia mi (natural) gas a si lo. Minung pawl ih rannung/ramsa zuatnak le a baal kan hlon, kan khangnak pawl ruangih suak mi gas a si. Himi gas amah te’h hlo dingah kum za luan hngak ta a tul. Curuangah Greenhouse gases pawl khamnak lole malternak tuah loin kan feh asile Leilungpi a saa vivo hleiah natnak phumkim (bacteria le virus a tharthar), thlisia, le tilik khal a tam sin vivo ding a si. Hurricane ti’h kawhmi thlisia khal 2016 sungah leilung a saa vivo ih nikhua a thlengawk ruangah kum dang hnakin 80% rori a tam cuang ih minung tamsin harsatnak an tuar.global warming comparison

Cumi hleiah 2016 sungah natnak Asthama, cancer, cardiovascular disease (lung lam natnak a phunphun) le suahkeh ihsin thluak le thinlung lam damlonak pawl hi kum dang hnakin a tam. Leilungpi a daihsat (temperature) a sang vivo tikah khuasik caan a tawi vivo, spring a tuan vivo, acrtic lam ih ummi tikhal (polar ice) pawl khal an zup vivo ih tipithuanthum khal 3m in a thang zo. Curuangah tikulh le tidai kap ih ummi khua le ram pawl cu tilian harsatnak an tong ih, cumi ihsin natnak le natkengtu nunghring khal an karh sin. Kan Tipithuanthum hi tuvek ih a thang vivo a si ahcun tihnungza ngaingai a si. Leilung ih tidai hmuahhmuah lakah minung ih in theimi tidai (freshwater) hi 3% lawng a si ih a dang cu a al mi, minung ih in thei lo mi tipithuanthum sungih tidai an si. Cumi 3% sungih 30.1% hi tiva, tili, le cirhti ihsin kan ngah ih a tangmi cu tikhal (ice) pawl an si. Curuangah tikhal (ice) pawl an zup vivo asile cu tipithuanthum a thang lawng hman siloin, minung ih in thei mi tidai (freshwater) kan sung vivo tinak khal a si.

Leilungpi ziangruangah a saa vivo, cule leilungpi a saa vivo ruangah ziang pawl a cang timi a tawi zawngin kan rel zo ih tu cu nangmah le keimah in hi mi hrangah ziang tuah thei mi kan nei? Zumtu pakhat dinhmun in ziang kan tuah a tul timi kan ruattlang pei. Zumtu pawl in leilungpi hi nikhatkhat ah a siat leh ding ih netabik ni a thleng leh ding ti kan zum. Asinan cumi zumnak ruangah kan kiangkap ih a cangmi ziang siar lo ih um ding kan si hrimhrim lo. Ziangruangahtile Pathian in leilung mi ziangtluk a duhdawt ti theifiangtu kan si hleiah, Pathian in leilung a sersiam tikah a tha a ti ih nunnak a neimi khal siseh nei lo mi khal siseh kilkhawi dingah tuanvo in pek ti kan thei. (John 3:16, Seemtirnak 2:15, Mipumsiarnak 35:33-34, le a dang Bible cang tampi khal ah kan hmu thei) Curuangah kan ti thei tawkin kan kiangkap le leilungpi kilkhawi ding tuanvo kan nei.

Pumpak in kau le tum zet in kan kiangkap (environment) hrang hna kan tuan thei lo hmanah, nitin kan tuan thei dan tampi a um. Tahthimnak ah motor kan lei tikah gas a hmang mal deuh mi motor hawl in kan lei thei, biakinn le inn ah hnawm le recycle retnak pung 2 ret in recycle thei mi hmuahhmuah recycle kan tuah thei, takkolh/rawlsuan tikah meisa le tidai a mal theibik ih hman kan zuam thei, thaal le khawsik caan pawl ah energy (meisa tha) a malbik in kan hmang thei, motor tul loin kee thawn feh theinak hmunah kee thawn feh, acozah le policy tuahtu pawl hnenah energy a mal theibik in hna tuan dingah kan dil thei, cule kan kiangkap ih um pawl himi thu kan zirh/sim bet vivo thei a si. Cuti’h kan ralring zet hmanah ka sim zo vekin 21st century a cem tik ahcun leilungpi hi 2 degree Celcius in a saa thotho ding, na’n zianghman kan tuah lo bet ahcun 6 degree Celcius tiang a saa bet thei. Curuangah zumtu nulepa, ulenau kan zaten a ra lai ding mi generation hrang ruat in kanmah le ti thei tawk ten tan kan lak cio pei timi duhsaknak thawn ka lo sawm duh a si.


 

Share on Google+0Share on Facebook79

0 Comments

Add a Comment

Your email address will not be published. Required fields are marked *