7 20th St S, MI 49015
(www.myfbcbc.org)
oneness

KHRIH AH THINLUNG KHAT

Christina V. Sawnset (Hnem Hnem) | I Korin 1:10


Church sungah siseh, innsungsang ah siseh, rual le pi karlak ah siseh, hnatuanpi lakah siseh, pehtlaihnak neih ding hi a thupi zet. Ziangahtile pehtlaihnak a malnak hmunah theithiamawklonak a tam, theithiamawklonak a tamnak hmunah hmuhsualawknak a tam ih, hmuhsualawknak a tam tikah thinhengnak le thinlung nomlonak a suak, cutin thinlung damlonak a suahter theu. Thinlung a dam lo tikah, duhdawtnak a ziam vivo theu ih Pathian hna tuan tlang a har zet theu.  Pathian hna tuan tlang a har lawng siloin mai bulpak nuntu khawsaknak le a hmakhua tiang a siatsuah thei.

Pathian in minung hi thuruah theinak le fimnak in pek cio vekin, mah le ruahnak le zumnak cio thawn nungmi kan si. Tahthimnak ah;  Faphir hmanah an bangawknak a tampi vekin, an ruahnak le hmuhdan pawl cu an bangaw cekci cuang lo. Mirang tong in “nature and nurture” an ti ih, suahkeh ihsin kan neihmi lungput le mizia a um ih, cumi hleiah kan tonmi experience le kan thanlennak kiangkap ihsin kan zirmi pawl in kan thuruah dan tampi lai a rel bet.

Let there be no divisions in the church. Rather, be of one mind. United in thought and purpose. — I Corinthians 1:10

Kawlram in USA kan ra thlen tikah a bangaw lo mi background in ra mi kan tam bangtuk in kan ruahnak le duhdan khal an bangaw cio lo. Kan Church sung khal ah cuti vekin ruahdan le duhdan bangawk lo caan tampi a um ko ding. Curuangah khat le khat theithiam aw in thinlung dam te’h Pathian kan biak tlang theinak dingah pehtlaihawknak (communication) kan tuah a tul. Hruaitu pawl lakah siseh, mipi karlak ah siseh, mipi le hruaitu karlak ah siseh, kan thinlung hmuaw le theiaw sinsin theinak dingah effective mi pehtlaihnak kan neih theinak dingah pumpak cio in zuam ding ka lo sawm duh bet.

Cumi hleiah, Ed Stetzer timi in, ziangruangah mino, a hleice in college tlawngta tampi biakinn an thleng nawn lo ti mi research a tuah tikah reason pathum a tong ih cumi sungih a thupibik ih a hmuhmi cu college kai lai mi le kai theh zo mino tete pawl ih nunnak ah church in pehtlaihnak an nei mal tuk timi hi a si. Biakinn thleng nawn lo mi mino sungih zatek 80% hi an nauhak laiah biakinn thaten a thleng ringring mi an si ih, an upat tikah ‘biakinn ka feh nawn lo ding’ timi ruahnak khal nei dah lo tu pawl an si. Asile ziangruangah biakinn an thleng nawn lo timi thusuhnak a neih sal tikah biakinn an tul bik caan ah biakinn lamin pehtlaihnak a um lo an ti.  Tahthimnak pakhat cu: mino tampi pumcawmnak (career) le innsungsang an din thok caan, college an kai ih christianity zumnak thawn a kalhaw mi an zir caan, stress tambik caan pawl ah church ihsin pehtlaihnak a um lo hleiah zirsual tin mawhphurhnak le hrialnak (rejection) sawn a tam theu an ti.

Himi ka siar ngah tikah, keimah pumpak tla tampi nun in sim ih ruahnak a phunphun in neiter ih pehtlaihnak neih a thupitzia khal a thar in in theiter sal. Cuhleiah pehtlaihawknak a that ahcun duhdan bangaw lo ding khal in theihthiamawknak le pomsakawk thiamnak a suahpi ih cumi cu hmunkhat ih kekar tlangnak hrangih thazang a si. Kan church sung khal ah hmailam ke kan kar tikah, khat le khat pehtlaihnak nei in a dam mi thinlung thawn kekar tlang ding ka beisei zet. Cutin thlarau, thinlung, taksa a dammi pumpak cio kan si theinak dingah a siartu nan zaten parah Pathian in thlawsuah malsawm lo pe hai hram ko seh.


 

Share on Google+0Share on Facebook112

0 Comments

Add a Comment

Your email address will not be published. Required fields are marked *