7 20th St S, MI 49015
(www.myfbcbc.org)
falambiakinn

AW…FALAM

Aw… Falam, na kum (125) kim darkhing awn cu tipiral kan tiangin a thang ruangro. Na thuanthu ka thlirsak tikah thuanthu tha neitu na si. Nang cu Laihri zuunpi hrinhnam (11) in sihfuntu na si. Cuhleiah khualkhua tipiral ihsin a ra vaimi, Mingo le Misang pawl tiangin na faale dang thawn bangran in na rosartu dingah na ser hai. Na tanghlum hi a fip zetmi hrinhnam lungput pawl ziamralnak hmun a si. Na hrinhniang zate hrangah kau zet in na thla na pharh ih thleidannak umlomi na duhdawtnak sungah hlum tein in pom ih in cawi. Aw.. Falam na nun khua sau sehla na hrinhniang rual pawl cu Pathian in khaisang sinsin hramseh.

Aw… Falam, santhar Chin miphun cu 1948 ah na rak hring suak. Cuih ni ah Chin hnahkhatthlah unau mipum 5000 lai an rak kim. Hi ni ah “Chin Phunpi Ni” tiah Chin Thuanthu sungih hngilh nawn lo dingmi cahmai pakhat na rak ngan suak. Khuate hla sam thiam ningla, “Kawl phunpi ni Pyinlone in, Chin Phunpi Ni Falam in ee…” tiin sam ciamco sehla ka duh. Kum (69) a rei zo nan “ni a liam ih a thlum sin” an ti bangin hi ni cu Chinmi pawl kan thlennak hmun tin ah, kum tin sunloih in lungrualnak nitleu in hmuh sal ringringtu a si. Aw.. Falam, Chin miphun zate huapmi thuanthu mawibik neitu na si.

Aw.. Falam, nehnennak le nekrawknak na ton caan khalah thinsaunak, tangdornak le duhdawtnak in leh na rul. Na suum sungih Chin Mang Bawi ih Tohkham an put tlung laiah an ke rak phelh thei na rak si ding nan, liangdam sawn na rak ken. An sia a rem theinak dingah nangmah ih siaremlonak sawn na rak hril. Chin ram tundin na duh tuk ruangah hramlak tupi sungah Bantaw ei in rilrawn na rak tuar. Surhan kian lo niheng tangah sawizawi aw in hriamhrei na rak kai. Nunnak na liam, thisen a luang, mithli for in ruahsannak thawn hmai na nor laiah na tonak a rak hlo. Hi lai khalah thihnai suak ding na hrial ih na mitthli sawn na rak thaap. A rahpar tlan a cu ih na thianrual pawl donhleisang tlun an thlen tik khalah theng tang ihsin lungawipinak papa na rak beng sak thei thotho. Aw.. Falam, nang cu nangmai’ tanghmai sial ding hnakin Chin miphunpi hrangah pumpektu na si.

Jesuh in, “Mi pakhat in a rualpi pawl hrangah duhdawtnak tumbik a neihmi cu an hrangih a nunnak pek hi a si,” tiah a ti (John 15:13). Aw…Falam, na lamzin hi kan Bawipa Jesuh ih lamzin a rak si ual! Hi lamzin hi thlun hrih vivo aw, cule kei tla na dungin ka lo thlun ve ding.

Falam kum (125) kim, Falam Siizung kum (100) kim, Falam Seenpi Inn Kum (100) kim le CND sunloih upatnak pek phah in,

Cinmualtlang

 

Share on Google+0Share on Facebook0

0 Comments

Add a Comment

Your email address will not be published. Required fields are marked *