7 20th St S, MI 49015
(www.myfbcbc.org)
images

Laimi le Pathian ih Tumtahmi

Phun Hram Awi

Atu laifang ih Laimi kan dinhmun hi thlirdaan phuntampi thawn thlir tulmi dinhmun ah a dingmi mi miphun kan si thlang. Cuti ih kan ti tikah a pakhatnak ah Laimi pawlih a ra lai dingmi kan thuanthu, sidaan ding, sunmang, hnatuan tlang daan ding le Laimi sinak thuhla pawl hi thlirdaan pakhat le hmundaan pakhat te lawngih thlir ahcun fuh zetih simtheih a si nawn lo kan ti duhnak a si. A pahnihnak cu Laimi hi a hlan kum 40 hrawng ahcun Lairam le Kalay kiangkap lawngah kan rak um dah nan atu ahcun Kawlram khuapi tintian ah le Leitlun ram tumpipi ah kan thleng thluh zo. Laimi um lonak leilung le ram hi a mal vivo zo. Curuangah Laimi pawl hi thlirdaan phun tampi thawn thlir in hmailam Laimi sinak le dinhmun hi simfiang le sawm awk a tul. Hi cahmram hi Laimi pawlih kan sinak le dinhmin hi thlirdaan phunkhat ih ngan tummi a si ih cuih thlirdaan cu Pathian ih Laimi pawl in hman duhzia timi thlirdaan kha a si. Tongdang ih kan sim ahcun Laimi le Pathian ih tumtahmi ti a si. Cucu a tanglam vekin a tawi zawng tete kan zoh vivo ding.

Laimi: Aliamcia le atu

Laimi pawlhi nuam zetih um theimi le a nuam aw thei zetmi miphun kan si. Lai khawte ih umkhawm a nomdaan, khawte nun ih a himdam daan, le khuasungmi pakhat le pakhat nuam zetih a pawlkom aw theimi miphun kan si. A burbur ih umkhawm aw in nuam zetih um duhmi miphun kan si (Community life). Cuih nunphung sungih sin a thanglianmi kan si. Ramdang missionary pawl an thlengih cuih nunphung parih sin rundamnak thuthang tha kan theih ngah beet tikah miphun nuam lawng si nawnlo in miphun thangso ah kan cang. Zirnak le thiamnak a phunphun kan congah vivo tikah Laimi nun hi Kawlram sung hnamdang pawl kan hleihnak tampi a hung um. Laimi hi fimthiamnak nunphung lamah a sang zetmi dinhmun ah kan thleng. Cun, tikcu caan a thleng awk vivo tikah ramdang lam pan daan kan thiam vivo. Lairam suahsan in ramdang lamah kan pan vivo. Ramdang kan thlen daan cu pakhat le pakhat a bang awlo. Fimnak zir in a tangta mi pakhat hnih hrawng, Khawmpi zawhih a tangtami malte, avai ih vai lawlaw pawl khal hnihkhat an um. Atambik cu Kawlram ukawknak thatlo ruangih refugee in ramdang ih a thlengmi kan si. Atu ahcun USA, Canada, Australia, Norway, Switzerland, Sweden, Germany, ti vekin ram tampi ah Laimi tampi kan rak thleng. Himi hin Laimi kan dinhmun a langtermi cu Laimi cu leitlun huap miphun, ramtin huap miphun pi kan si ti kha a si. Cucu dinhmun a si ih sinak thu ah atu lai ramdangih a thlengtu Laimi pawlin Lairam ih a ummi maih nu le pa sungkhat unau pawl an cawm ih an dinhmun le nuntu khawsak daan a thangso ngaingai. Maih sungkua lawng siloin khua le ram, miphun hrangih a huapmi hnatuan thatha tla an tuan vivo. Cumi cun Laimi kan sinak hi khui hmun khalah kan hlohterlo ti a langter. Cuhlei ah Laimi sinak hloh theihlonak dingah thil tha pakhat an tuahmi ti ih ka hmuhmi cu Laimi cu Khristian kan si bangtukin Laimi Khristian Kawhhran tin an pawlkom aw. Pathian thu in an cawm aw. An kilkhawi aw. Cun nunphung pawlkomnak teta khal an din. Cumi lakah Pathian thu ih an kilkhawi awk hi a thabik miangmo mi pakhat a si. Cucu a thalam ih atu laifang Laimi pawlih kan sinak le dinhmun a si.

Laimi le refugee thu

A tlunlam ih kan sim zo bangtukin Laimi pawl ramdang kan thlennak lamzinpi pakhat cu refugee hi a si. Refugee ti hnuhnu ahcun rampi thu le nuntu khawsaknak thawn pehparnak a nei. Laimi le refugee thu thawn pehpar aw in hmuhdaan a phunphun in a um. A sia zawngih a hmutu cun thuphan le depdet zin a si an ti. Asinain cutin sim cing in kan unau sungkhat suahpi pawl refugee in ramdang an thleng thotho. Curuangah mihrek cun refugee hi Laimmi hrang ahcun the second best a si tin an hmu ve thlang. Ziangah tile Laimi hrangah a thabikmi hi Kawlram acozah in a tuah sak theilo ih Laimi hrangah a thabikmi a um theilo ruangah a thabik sangtu refugee hi Laimi hrangah a thatnak a um ve ko tin an hmu. Cun, mithen khat lala cun refugee hi Pathian in Laimi hrangih a thluasuah sangka pi in onsaknak a si tin a hmutu an um. Cumi nunkhawsaknak thu thawn thlir ahcun a diknak tampi a um ve fawn. Cu pawl cu Laimi sungih kan hmuhdaan a si. Laimi a silomi miphun dang pawlih an hmuhdaan khal hi tarlang sehla:

  1. Daw Aung San Su Kyi ih hmuhdaan:

Norway ram ah Kawlram Democracy hotu Daw Aung San Su Kyi Norway ram a tlawngih a kir sal tikah Norway ram a tlawnnak thu hitin a sim. “Norway ih khual ka tlawn hi Lairam tlawng tlukin ka ruat aw. Norway ram ah Laimi tampi an um. Lairam hrangah hna tampi an tuan” tin a sim. Refugee ih a siat le a thatnak hnakin kan ram ih dinhmun diklo le ukawknak thatlo thu hi a sim duh sawnmi a si.

  1. ABC: Refugee volunteer nupa te ih hmuhdaan:

An hmin cu ka cing nawnlo. Anmah cu America Baptist Churches(ABC) tangah hnatuanmi an si. Volunteer in Thailand Baptist Convention ah an pa cu General Secretary a tuansak hai. Kawlram ihsin USA ih refugee in a ra mi Karen miphun pawl kilkhawitu an si. Cute nupa cu Kawlram ah voikhat an ra tlawng. 2012 March 30 ni MBC hnatuantu pawl biakkhawmnak ah thu an sim. Cuih an thusimmi ah, “Aliamcia kum 200 hrawngah USA in Kawlram ah missionary pawl tampi thlah in hna kan tuan. Atu kum 200 a kimzik tikah USA cu thlarau lamah kan tlasam. Nuntu khawsaknak lamah kan thangso zetko nan Biaknak lam ahcun kan tumsuk ngaingai. Kan Kawhhran hi a thi cuahco mi Kawhhran (the Dying Church) kan si. Biakinn a thlenglo tu Khristian tampi an um. Putar le pitar pawl lawng an feh. Zarhpi zing ih a khawm awtu pawlhi minung 10-15 hrawng hrang kan si. Cumi pawl cu kum 60-70 luan hlir an si. Curuangah hi putar le pitar pawl an thih hnu ahcun Kawhhran hi a cem vivo ding. Asinain atu ahcun Pathian in Kawlrammi hmangin USA ah Kawhhran thangphawknak a tuah tum tin kan hmu. Karen, Kachin le Chin refugee tampi an thleng. Kawhhran an din. USA ih a umciami Biakinn ah an khawm aw. Thla an cam. Pathian thangthatnak hla kan sak dahmi an saksal tikah kan thinlung thupten ahlanih kan Khristian nun kha in mangter sal. Cu tikah USA ih Biaknak lam hruaitu pawl, Mino pawlin khua an ruat vivo. Biaknak nun, thlarau lam thu kan ruah sal a cu an ti vivo. Curuangah refugee ih ramdang a fehtu pawl hi kaphnih thatnak an tuah. A pakhatnak ah America ram ah thangphawknak a voithumnak (the Third Great Awakening of the American Churches) reilo te ah an suahpi cing ding. Pathian in Kawlram mi refugee pawl hmangin thlarau thangphawknak a tuah tum tin kan hmu. Curuangah Kawlram mi pawl parah kan lung a awi. Refugee hi Pathian in Kawlram hmangin America thangphawkter a duhruangah a si. A pahnihnak ah USA an thlen tikah an ngahmi pawlhi an nu le pa, unau sungkhat hnen ah an kuatih hi tawk lamih a ummi pawl hrangah thiltha an tuah tin kan hmu. Curuangah refugee hi globally, Kawlram mi hrangih Pathian tumtahmi a duhnak pakhat a si ve ko tin kan ruat,” tin an sim.

Laimi le Pathian tumtahnak

Ziangvek zin in a si khalah Laimi pawl hi leitlun ram tampi ah kan thleng theh zo. Kan thlennak ram tinah Kawhhran kan din. Pathian thu sungah pawlkom awknak kan nei vivo. Pathian thu in kan kilkhawi aw. Cu vekin nunphung thawn a pehpar awmi pawlkomnak, thansonak pawlkom tete, le burkhawm hnatuan tlangnak ti pawl kan din vivo. Laimi pawlhi paksai hnakin a bur ih um hi nuam zetih a ruattu le nunphung neitu miphun kan si. Cucu kan thatnak pakhat a si. Asinain kan tlaksamnak pakhat lala cu a bur ih um duh zet miphun hin burkhawm aw ih hnatuan tlangnak ah thil pipa (picang) kan tuah suakmi a mal zetih hlei ah kan pawlkom hi rei a daihmi pawlkom a si thei dahlo. Ziang a si khalah burkhawm aw in a nuam tlang theimi Laimi pawlhi Pathian ih duhmi burkhawm nun Kawhhran sungih sin hna thupi tuan thei ding hi cu in duhsak bikmi le a tumtahmi a si ko. Cun, Laimi hmuntin kan thlennak hi refugee ruangah a si. Refugee hi Laimi in thekdarhtu vek a bang. Sihmansehla Laimi hrangah refugee hi ziang a si ti hi ruah a tul. Refugee hi Laimi hrangah cun:

 

  1. Leitlun huap ramthim hna tuanthei dingah Pathian ih hmanmi a si.

Hi tin ka sim tikah casiartu tam nawn cu a mangbangmi khal an um ko ding. Ziangah cutin ka sim thei tile Kawhhran nun le Khristian zumnak lam ih a tla niam cuahco mi USA le Europe ram tampi ah Laimi kan thleng. Hlumtu le biakkhawmtu a um nawnlo mi Biakinn pawlah Laimi pawl an khawm aw, Pathian thu an sim, thangthatnak hla an sak, thla an cam. Cuih Khristian nun duhnung cu a um ciami miphun pawlin an hmuh tikah a liamcia ih an Khristian nun kha an vun mang sal. Biakinn lam pan an tum vivo. Thangphawknak a pe hai. Cucu a tlun ih ka sim zomi pawlih an simmi a si. Hitin USA le Europe ram pawlah thangphawknak um thei dingah Laimi in missionary thlah tum sehla kan tlin thei dahlo ding. Curuangah Pathian in refugee hmangin USA le Europe ram pawl thangphawknak tuah dingah Laimi pawl hi a missionary ah in hmang. Refugee hi Laimi pawl leitlun huap missionary hnatuan dingah Pathian ih a hmanmi a si.

  1. Leitlun huap missionary tuantu dingah Pathian tumtahmi miphun kan si.

Laimi pawl hi Pathian in hman in duh ngaingai. Laimi le Lairam sung lawngah a si lo. Kawlram sung hmuntin tian khalah in hmang duh. Leitlun khuaza ramkip ih missionary tuan thei ding khal in duh. A duhnak leitlun ih a kim theinak dingah Laimi pawl hman in duh. Cucu Laimi pawl parah Pathian ih in tumtah sakmi an si. Cutin in hman duh ruangah refugee thawn hmun tin ah in kuat. A si. Refugee um lo sehla Laimi pawlhi hi tlukin ramdang ah kan thleng thei lo ding. Curuangah thinlung thianghlim ten kan cohlan awk le kan theihfiang awk a tulmi cu Leitlun huap missionary hna tuantu dingah Pathian ih tumtahmi miphun kan si ti a si.

Laimi pawlih  zumnak le lungput

Laimi pawl hi a hlan vekin a kelte thu ruahdaan in thu ruat ding kan sin nawn lo. Ahlan vek kan si nawnlo. Hmun tampi ah kan um. Thuruahnak dangdang lakah kan tlangleeng. Nunphung dang tampi lakah kan nung. Ukawknak a bang awlo mi phun tampi lakah kan um. Nuntu khawsaknak a bang awlo mi dinhmun ah kan ding thluh. A hlan kan sinak thawn a danglam vivo zo. Curuangah ramdang ih a thlengtu pawlih thinlung sungih ruah ringring a tha ka timi pawl cu:

  1. Missionary kan si.

Ramdang ih a thlengtu le nun a khuartu Laimi pawlih thinlung sungah kannih cu Pathian ih thlahmi a missionary kan si ti hi a si.  Missioanry hna tuandaan cu sumpai thawn Kawlram ah maw? Lairam ah maw? missionary thlah ti lawng silo in maih umnak ram ah nitin nun le biakkhawmnak nun thawn an hnen ah thangphawknak mission hnatuan kha nunnak ih tuantu kan si tihi theihfiang awk a thupi tuk. A kuat lawng silo in Pathian in Khristian nun le zumnak a derthawm vivo mi ram ah thangphawknak tuahtu dingih kuatmi missionary kan si ti hi a si.

  1. Laimi ai-awh tu kan si.

Zo hman in Laimi ai-awh nan si tin official ca thawn tarlangmi kan silo a tul daan in Laimi ai-awh kan si ti hi theih a tul. Ziangah tile midang in Laimi miphun hi ziang vek miphun an si ti hi an ram ih a ummi Laimi pawlih nundaan in an thei thei mai. Cu vekin Laimi pawl kan tul an ti ahcun  a tultu pawl thawn a naibik ih a umtu pawl hnenah an pan ko ding. Cuvek thu khalah ramdang ih a thlengtu Laimi pawlhi Laimi pawl Leitlun huap miphun kan si zia kha Laimi ai-awh ih langtertu, dinpitu an si. Cucu ramdang ih a thlengtu pawlih lungput a si ding a tul vekin ram a hlumtu Laimi pawl khalih kan lungput ding a si ih kan cohlan thei a tulmi khal a si.

Thunet

Laimi pawl hi hmuntin ramtin um miphun, Leitlun huap miphun kan si. Umnak thu ah leitlun huap miphun kan si vekin nundaan le lungput thu khalah Leitlun huap lungput tum le kau kan neih a tul. Peng le hnam lungput fiak ihsin luat kan cu zo. Curuangah a tlun lam ih kan sim vekin Laimi pawlih kan sinak le atu ih kan dinhmun hi thlirdaan phunkhat le hmuhdaan pakhat thawn cuan loin a huapkau mi thlirdaan thawn kan thlircon a tul. Cohlan daan thu khalah thu pakhat par lawngah hrambun loin thuhla tum le kiangkap dinhmun thlirin cohlan awk thiam a tul. Maih duhdaan ti lawng siloin mitam duhdaan thawn thlir a tulve. Duhdaan le tuldaan hi thlei dang thiam a tul vivo. Cutin a kau zawng le thlirdaan phun tampi thawn kan thlir ih kan cohlan awk ahcun a burnun ihsin hnatuan thupi le picang kan tuan tlang thei vivo ding.

 

Share on Google+0Share on Facebook0

0 Comments

Add a Comment

Your email address will not be published. Required fields are marked *