7 20th St S, MI 49015
(www.myfbcbc.org)
sharing-1

U Nau Thei Pum Seu

Biak Lian Thang

Nazi pakhat lai tuan deuh in ka thleng ruangah ka to dingmi vanzaam hngak phah ah Hitherto International Airport sungih duty free dawr pawl ka lengphah vivo. Umharphen ih ei dingah biscuit hmuk tla ka hei lei phah.  Tawkfang ka vak hnu ah ka bang deuh ih Airport sungih mikhual colhnak khan sungah ka lut ih ka to.

Umhar phen ei ding ih ka lei ta mi biscuit hmuk cu ka ei phah rero.  “Ai..ai..ai… a ning hman zak lo,” ziangtik lai ih ra to ti ka thei lo mipa pakhat cu ka hmuk  a pur ih a ei ve …..dil hman dilta lo in a ei ngam, a ninghman zak lo in. Ka thin a hengtuk ruangah ka hmuk cu cemzangseh ti’n zamrang zetin ka kaa sungah cun ka bar ciam co. Cu pa cu poisa lo riai in hmuk cu pakhat hnu pakhat nuamdai ten a ei rero thotho. Ka mit a kem sin sin. Curuangah mitu hnak ih rang deuh in hmuk cu ka mom ciam co. A thawtnak tla ka thei nawn lo. Cem zangseh ti lawng ka ruat. Cuticun, hmuk kuang sungah hmuk cu pakhat te lawng a tang thlang. “ ka zoh hnik ding.. hi pa hi ziang a tuah ding???,”

Aizelaw!!!!! a laak thotho lai hrih khi….hmukfirpa!! hmukfirpa!!!… a lai fangin a phel in a hrek cu a ei ih a hrek cu hmuk kuangsungah a ret sal…. ka lam a hawi ih hnisiamsi in i zoh  …cu le a bag a lak ih mipi lak ah a hlo ta…….ka mitkemnak dikari sangbik a thleng….a hrangih kaih dingmi  tongkam ka hawl lohli……..ka thinlung sungte’n, “Uico pa,”.

Nazi  khuai hrawng Vanzam ka to hnu ah ka khua a dai deuh ih puante lak dingah ka hand bag zit ka ong ih puante hawl in ka bag sung cu ka dap phat vivo. “Aih!!..Aih!!,” cahnah khoh nawn ih tuammi  thil pakhat  ka von dap ngah.  Biscuit hmut kuang ding a va bang ve. A lengah ka von phorh. “OH!! My God!!!,”  Airport sung ih ka lei ta mi Biscuit hmuk ….a mahkel te’n a rak um lai..Asile mitu ih ka ei mi hmuk teh zo ta???? “ka nu..ka nu!!!!”  Ka mitthlam sungah  hmukfir tiih ka puh mipa a hung lang dukdi….. “ A hmuk ka ei sak rero nan mithmai pan te’n  i zoh thotho si khawh……pakhat te a tang hman ah a hrek i seu lai si khawh… kei cun “ningzak nailopa, hmukfirpa….Uico pa,”  tiah… ka ruat ngam nawn lo…………”

Atlun ih thuanthu hi ka raksiar dahmi “The Thief” timi cahram ka cin bantawk ka lo hleh hai mi asi. Atu ah ka pu ih i rak sim dahmi  thuanthu ka lo sim sal ding.  Voikhat cu mi pahnih ram an tawi. Cepa le Varit an ngah. Upa deuh ih savozem theu  asi ruangah, a upa sawn pa in, “Cepa na duhle Cepa lak aw la, Varit na duh le Cepa lak aw,” tiah vo a zem ti asi.

Lai Pupa tongfimah “Unau Theipum Seu” timi aum. Simduhmi cu u le nau taktak cu thei pumkhat te hman an seu aw tinak asi. Kan Baibal sung kan zoh asi le “zumtu pawl cu an naihmi an keng khawm ih hmunkhat ah lungawi in an ei tlang,” Tirhthlah (2:47)  timi kan hmu thei.  Himi lungput hi “ka ta cu na ta, na ta tla ka ta” timi buukawton/hlawmawton  (communal spirit/sharing spirit) lungput a si ih, hmukfir tiih puhmawhnak tuar tupa ih naihmi lungput asi. “Cepa na duh le Varit lak aw,” timi lungput cu “ka ta cu ka ta, na ta tla ka ta,” timi mai’ hrang lawng huiduhnak Ttanghmaisial/Cangvut lungput (Capitalism)  asi.

Himi lungput phunhnih hi Laimi Khrisfa bu sungah cuai khai bang ta seh la, khuaimi lungput ih khing a rit deuh ding na zum???? Tamtuk in teh a hlaih pang maw????

 

 

 

Share on Google+0Share on Facebook79

0 Comments

Add a Comment

Your email address will not be published. Required fields are marked *